ADUNAY mga grupo sa mga eksperto gikan sa Commission on Higher Education (CHED) ug sa House of Representatives Committee on Higher Education ang mag pahigayon ug tulo ka adlaw nga evaluation sa Davao Oriental State College of Science and Technology (DOSCST) main campus ingon man sab sa Cateel, San Isidro, ug Banaybanay nga mga campus karong Abril 12-14, 2018.
Ang balaudnon nga gisulat ug gipasa ni Congressman Joel Mayo Z. Almario sa Distrito Dos sa Davao Oriental aron mamahimong Davao Oriental State University (DOrSU) ang DOSCST kay aprubado na sa ika-tulo ug katapusang pagbasa sa House of Representatives ug sa Senado, ug nagpaabot na lamang sa pirma ni Presidente Rodrigo Roda Duterte aron kini mamahimong balaod. Ang mga estudyante, magtutudlo, ug tanang empleyado sa DOSCST mipirma sab ug petition request alang sa paspas nga paghimo sa balaudnon ni Almario ngadto sa usa ka balaod.
 |
| (c) doscst.edu.ph |
“Ilalom sa Section 23 sa Balaudnon, aron maka operate ang DOrSU isip usa ka full-pledged state university, kinahanglan nga makapasa ang tulunghaan sa CHED University Classification Requirements,” pagklaro ni Almario.
Pipila sa pagasusihon sa mga eksperto ang mga programa, enrolment statistics, faculty, structures and facilities, ug uban pa. Magpahigayon ug exit conference ang grupo kada human sa ilang pagbisita aron maghisgot sa mga findings ug magsumite sa ilang tagsa-tagsang reports.
 |
| (c) doscst.edu.ph |
“Kaning pagbisita sa CHED kay usa gyud ka mahinungdanon nga panghitabo. Nanghinaot ko nga masabtan sa tanan ang kabug-aton ani nga aktibidades ug tabangan ta ug ampo nga positibo ug pabor kanato ang resulta sa evaluation. Usa kini ka dakong parte sa history sa skwelahan,” pagtapos ni Almario.
“Ang kaniadtung representante sa Distrito Dos, Congresswoman Thelma Z. Almario, nga mao sad ang founder o nagmugna sa DOSCST (kaniadtung Mati Community College o MCC), mu-partisipar sab sa aktibidad isip parte sa DOSCST committee nga maoy mu-assist sa panginahanglanon sa mga evaluators nga gipanguluhan ni DOSCST President, Dr. Edito Sumile.
