NAKUMPISKA NGA MGA KAHOY NAPUSLAN SA ESKWELAHAN SA SAN ISIDRO UG GOVERNOR GENEROSO

NAGMALAMPUSON ang pag turn-over sa 200 ka gama sa kahoy nga mga lingkuranan sa San Isidro Central Elementary School (SICES) sa San Isidro, Davao Oriental ug Luzon National High School (LNHS) - Tamban Annex sa Governor Generoso, Davao Oriental nga personal nga giadtuan ug giapilan ni Congressman Mayo Z. Almario sa Distrito Dos sa Davao Oriental.

Apil sa mitambong sa seremonya sila PENR-Officer Gregorio Lagura, CENR-Officer (Lupon) Rey Sator, DepEd Administrative Officer-V Arnold Benabaye, Batobato Punong Barangay Sheela Navarro, Tamban Punong Barangay Rudy Rubio, SICES Principal Angelo Rey Susosco, LNHS Principal Jonathan del Rosario, mga ginikanan, ug mga estudyante.

Ilalom sa Executive Order 23, ang Department of Education ang pinaka una nga hatagan ug prioridad sa pag gamit sa mga kumpiskadong kahoy tungod sa ilegal nga pagpamutol. Pinaagi sa paningkamot ni Congressman Almario nga matuman ug maimplementar ang maong executive order sa iyang distrito, apil ang DPWH sa iyang gi-direktahan nga mu-pick-up ug deliver sa mga kahoy nga naigo ug naputol tungod sa mga road widening projects ngadto sa opisina sa DENR (PENRO/CENRO).

Ang MAYOng Edukasyon Para sa MAYOng Kaugmaon, ang principal program ni Almario, nakita ang hangtud karon nagpabilin nga panginahanglanon sa mga bangko sa mga skwelahan labi na sa mga pampulikong tulunghaan. 

"Akong paningkamutan nga tanan gikumpiska nga mga illegal logs mapuslan gyud isip lingkurangan diin magamit sa mga eskwelahan ug mga estudyante. Tungod kay pulido ug kalidad man ang mga kahoy nga gigamit pati ang pagkabuhat, kampante ta nga mudunar ni ug pila ka tuig, basin pa gani ug henerasyon", sulti ni Almario sa iyang mensahe.

 Bisan pa man ug wala makatambong sa maong turn-over ceremony, wala gikalimtan ug pasalamat usab ni Almario ang TESDA nga maoy ahensya nga nangunay ug himo sa mga wooden armchairs pinaagi sa ilang Training cum Production nga programa sa kursong Carpentry.

CIUDAD SA MATI USA NA KA CSC ELIGIBILITY EXAM CENTER

APRUBADO na nga testing site ang Ciudad sa Mati para sa Civil Service Commission (CSC) Career Service Examination, Pen and Paper Test (CSE – PPT) sugod karong tuig 2018.

Niaging Oktubre 2017, si Congressman J. Mayo Z. Almario sa Distrito Dos sa Davao Oriental mihangyo kay CSC Chairperson Alicia dela Rosa-Bala nga ikonsiderar ang Ciudad sa Mati isip posibleng lokasyon para sa qualifying exam.

Sa wala pa matapos ang tuig, gitugot ni Chairperson ang hangyo ni Almario. Isip tubag sa representasyon ni Almario nga mag tanyag ug bisan unsang klase sa tabang nga kinahanglanon sa CSC aron magmalampuson ang CSE – PPT sa ciudad, hugot nga miingon si Chairperson nga ang eksaminasyon kay pagahimuon kas-a sa usa ka tuig ug kada sunod tuig.

           

“Gusto nako mahimo ang Mati nga regular nga testing center kada CSC exam diin kaduha sa usa ka tuig. Apan mapasalamaton gihapon ko kay Chairperson Bala ug sa CSC sa pagtugot sa akong gihangyo bisan pa man ug sa sinugdanan, limitado pa lang sa ka usa kada tuig ug kada sunod tuig. Ako gihapon paningkamutan nga i-kumbinse sila nga himuong kaduha sa kada tuig”, sumala pa ni Almario.

Ayha ani, ang Tagum City, Davao del Norte ang pinakaduol nga exam center para sa mga tao sa Davao Oriental nga nagbutang nila sa apeke nga sitwasyon. Ang kalay-on sa Tagum ug Mati, nga maoy capital sa Davao Oriental, mudagan ug  kapin kun kulang 110 kilometers. Para sa mga residente nga mag gikan pa sa kinatumyan nga parte sa probinsya sama sa Baganga ug Governor Generoso, ang byahe padulong Tagum mudagan ug halos usa ka adlaw.

(c) http://images.wisegeek.com

Padayon ni Almario, “Akong tuyo gyud nga ang katawhan sa Davao Oriental nga adunay saktong training and skills, apan way kapasidad nga mubyahe ug mukuha sa exam tungod sa pinansyal nga kakulangon o adunay mga babag sa pisikal nga aspeto, mahatagan ug pantay nga kahigayunan sa pagkwalipikar.”

Sa pagtugot sa Ciudad sa Mati nga mahimong CSC exam site, di na kinahanglan pa mugasto ug dako para sa pagbyahe, pagkaon, ug lodging sa mga mu-take sa CSC Eligibility Exam nga, bug-at para sa ordinaryong pamilya. Mamahimo na sab nga maminosan ang pisikal ug emosyonal nga kakapoy nga maka apekto sa pagtubag sa mismong adlaw sa eksaminasyon.