LIBRENG ACCESS SA INTERNET SA PAMPUBLIKONG LUGAR HAPIT NA PAGASUGDAN

NAGPAGAWAS ang Department of Information and Communications Technology (DICT) sa bag-o nga bersyon sa draft implementing rules and regulations (IRR) para sa Republic Act 10929, nga mas nailhan nga  “Free Internet Access in Public Places Law”.

Ang draft IRR nag-ila sa mga pampublikong lugar nga malukop sa balaod apil na ang “unserved and undeserved areas” diin ang kinatibuk-ang gamit ug access sa internet kay sigurado, sama sa, apan dili limitado sa, computer laboratories ug libraries sa mga pampublikong tulunghaan ug state universities and colleges, main lobbies ug hallways sa mga pampublikong pamuhatan ug transport terminals, apil sab ang mga main assembly points sa mga public parks, hospital ug health centers”.

Nagpadayag sa iyang suporta sa bag-ong balaod si Davao Oriental 2^nd District Representative Joel Mayo Z. Almario ug miingon sa DICT executive committee nga aprubahan ang draft IRR sa labing dali nga panahon. Suma ni Almario, “Sa proklamasyon sa bag-ong balaod nga naghatag ug libreng access sa internet sa katawhan, dili na matungkad ang legasiya sa administrasyon ni President Rodrigo Duterte. Di na pwede himuong rason ang ka-ignorante o walay kahibalo tungod sa wala nay putol ang access sa impormasyon nga makuha sa miskan kinsa.”

Padayon ni Almario, “Kini usa ka dakong tikang sa kauswagan padulong sa tinud-anay nga globalisasyon ug hisgutanang technological advancement. Tungod kay ang tanan aduna nay pantay nga access sa internet, tanan aduna nay papel sa pag-uswag ug paglambo.” Pagtapos sa congressman, “Akoang paningkamutan nga maapil ang probinsya sa Davao Oriental sa DICT’s priority list sa mga lugar diin asa i-implementar ang programa. Gusto nako nga pahimuslan sa mga estudyante sa Davao Oriental, ug gamiton sa saktong pamaagi ang higayon nga mapalambo ang ilang kaugalingon aron makatabang sab para sa kaayuhan sa probinsya ug sa tibuok nasud.”

Photo (c) www.abogado.com

Ang draft IRR nagtugot sab sa pakig-partner sa mga pribadong sektor ingon man sa paghatag ug mga tulumanon ug kwalipikasyon para sa mga pribadong partners. Gitugtan sab ang mga Internet providers nga magkuha ug Internet connectivity direkta sa satellite service ug uban pang mga mutungha nga mga providers. Naka lakip sab sa IRR ang pagbawal sa pag access sa mga pornographic websites gamit ang libreng internet sa pampumpikong lugar.

LUPON SCHOOL OF FISHERIES MAMAHIMO NANG DAVAO ORIENTAL POLYTECHNIC INSTITUTE

Ang Lupon School of Fisheries (LSF) hapit na mag operate sa bag-ong ngalan nga – Davao Oriental Polytechnic Institute (DOPI) – aron mapakita ang aktwal nga mga kurso nga gi-dalit sa tulunghaan.

Ang LSF natukod niadtong 1982 ug nag dalit ug agri-fishery courses sa mga estudyante nga wala ug dili makapadayon ug tungha sa kolehiyo. Nailhan ang LSF isip usa sa mga Centers of Excellence sa Mindanao sa larangan sa Aquaculture. Tungod kay napili ang tulunghaan nga recipient sa Germany’s Expansion and Dual Training and Education Project, hinay-hinay sab nga ni-expand aron magdalit ug ubang kurso nga siguradong makahatag ug trabaho sa mga mga makahuman.

Ilalom sa Technical Education and Skills Development Authority (TESDA), ang LSF natagaan ug award nga Gold Accreditation sa Asia Pacific Accreditation and Certification Commission (APACC). Gawas sa agri-fishery nga mga kurso, aduna nay 21 ka competency-based qualifications ug diploma courses sama sa tourism services, information and communication technology, electronics, community development services, ug food and beverage processing.

(L-R) TESDA Davao Oriental Provincial Director Leah D. Braga, Congressman Joel Mayo Z. Almario, LSF School Administrator Ruth R. Pundang

Photo (c) Jeffrey Medalla

Ang House Bill No. 6724 nga gi file ni Congressman Joel Mayo Z. Almario, gi-uluhang An Act Changing the Name of Lupon School of Fisheries in Lupon, Davao Oriental, Into the Davao Oriental Polytechnic Institute. Suma kay Almario, “Ang pagbaylo sa ngalan kinahanglan aron mahatagan ug pag-ila ang mga nadugang nga kurso sa LSF. Kinahanglan sab mapasabot nga ang LSF dili lang limitado sa agri-fishery nga mga kurso ug sa Munisipyo sa Lupon.” Dugang pa ni Almario, “Kinahanglan nga mailhan ang tulunghaan nga usa ka institusyon nga ga-dalit ug klase-klaseng mga kurso nga ang tumong mao ang pagpalig-on sa kapasidad sa human resources sa Davao Oriental ug sa tibuok rehiyon.”